Maríanna Clara Lúthersdóttir leikkona rifjar upp eftirminnilegustu hlutverkin.
„Ég veit það er klisja en það er í alvöru mjög erfitt að gera upp á milli hlutverka,“ segir Maríanna Clara Lúthersdóttir leikkona, spurð að því hvaða hlutverk séu eftirminnilegust á ferlinum. „Og yfirleitt elska ég hlutverkið sem ég leik hverju sinni,“ bætir hún brosandi við. „Sum eru eftirminnileg af því þau voru svo erfið og gefandi, önnur af því maður lék þau svo lengi og enn önnur því að hópurinn sem stóð að sýningunni var svo skemmtilegur að helst hefði maður viljað að samvinnan héldi endalaust áfram!
Ætli ég myndi samt ekki nefna Fullkomið brúðkaup sem Magnús Geir Þórðarson leikstýrði hjá Leikfélagi Akureyrar. Þar lék ég fyrsta kómíska hlutverkið mitt og hafði í raun varla hvarflað að mér áður að ég gæti gert eitthvað grín! Við bjuggum öll á Akureyri þennan vetur, ég og Esther Talía og Álfrún Örnólfs, Gói og Jói og svo var auðvitað Þráinn Karlsson þarna og það voru mikil forréttindi að fá að leika með honum og kynnast honum og Rögnu, konunni hans. En þetta var mjög góður tími og markaði á vissan hátt upphaf mitt sem atvinnuleikkonu, að leika svona mikið og þétt og njóta þess.“
Maríanna nefnir líka Súldarsker eftir Sölku Guðmundsdóttur í uppsetningu Soðins sviðs en þar léku hún og Aðalbjörg Árnadóttir fjöldamörg hlutverk. „Maðurinn minn Óli Björn, Ólafur Björn Ólafsson, sá um tónlistina og lék á gamalt orgel á sýningum, Harpa Arnardóttir leikstýrði og þetta var bæði ótrúlega gaman og gríðarlega krefjandi. Svo kom Dýri sonur minn undir meðan við dvöldumst á skerinu niðri í Tjarnarbíói og kom með, þriggja mánaða gamall, þegar við fórum ári síðar með sýninguna í leikferð til Akureyrar.“
Svo segir hún að það hafi verið einstaklega gaman að leika Ungfrú Prússólín í Línu Langsokk í Borgarleikhúsinu í leikstjórn Ágústu Skúladóttur. „Hópurinn var dásamlegur og alltaf gaman að mæta í vinnuna. Ég varð auðmjúk gagnvart listinni og lífinu þegar ég áttaði mig á hvað það gladdi börnin og meðleikara mína í hvert einasta sinn sem ég settist á prumpublöðruna. Þrátt fyrir erfiðan vinnutíma og lág laun er þetta yfirleitt skemmtilegasta vinna sem ég get ímyndað mér!“
Mynd / Ernir Eyjólfsson