Þriðjudagur 6. desember, 2022
0.8 C
Reykjavik

Afbökuð jólakúla með fleiri en eitt hlutverk

Helgarviðtalið

- Auglýsing -

Orðrómur

- Auglýsing -

Ritstjórn Húsa og híbýla hefur í gegnum tíðina fengið skapandi fólk til að hanna einhvers konar „jólakúlu“ eða skraut á tré. Hér sýna þrír hönnuðir sína útgáfu. Karitas Möller, sem hefur numið arkitektúr við Arkitektaskólanum í Kaupmannahöfn, endurnýtti efni til að búa til sína útgáfu af jólakúlu.

 

Hver er hugmyndin að baki hönnuninni?

„Hugmyndin var í fyrsta lagi að endurnýta efni sem hefur fallið til við framleiðslu á öðru sem annars færi forgörðum. Í öðru lagi að afbaka „jólakúluna“ og gefa henni nýtt form og hlutverk, einnig utan jólahátíðarinnar. Að hún hefði fleiri en eitt hlutverk og ólíka möguleika á uppstillingu og staðsetningu,“ segir Karitas.

Hvaða leiðir voru farnar hvað varðar efnisval og formfræði?

„Ég fór til þeirra í Orgus, en þau eru sérfræðingar í akrýlsteini við smíði á borðplötum, innréttingum og fleiru. Ég fékk hjá þeim nokkrar afgangsplötur sem hafa fallið til við framleiðsluna. Það vildi svo til að plöturnar sem ég fékk voru í mjög fallegum litum og pössuðu vel saman. Einnig finnst mér áferðin og munstrin falleg í akrýlsteininum og skemmtilegt að vinna með hann.

„Ég fékk hjá þeim nokkrar afgangsplötur sem hafa fallið til við framleiðsluna.“

Ég fór síðan til þeirra í Logoflex, en þeir voru mjög hjálplegir og samvinnufúsir. Ég fékk þá til að skera út fyrir mig ýmis form úr plötunum, sem ég raðaði svo saman. Ég vil gjarnan koma á framfæri þökkum til Orgus og Logoflex fyrir samstarfið. „Jólakúlan“ sjálf varð að þremur sampúslanlegum einingum, sem hægt er að hengja upp og njóta hvort sem er á jólatré, á vegg, á borði eða í glugga. Þessar einingar púslast einnig saman í formskúlptúr sem getur staðið einn og sér þrátt fyrir að jólahátíðin sé liðin. Hægt er að leika sér svolítið með þetta og fjögurra ára sonur minn er strax farinn að dunda sér við að púsla þessu saman. Hver eining gæti túlkast sem lítið vetrarlandslag með arkitektónísku yfirbragði, þar sem hvítur, svartur og fölgrænn spila fallega saman. Snjór, myrkur og norðurljós.“

Karitas endurnýtti efni til að búa til sína útgáfu af jólakúlu.
- Auglýsing -

Hvað kemur þér í jólaskap?

„Þegar myrkrið hellist yfir dagana er mjög jólalegt að kveikja á kertum í skammdeginu og fá tilfinninguna um að jólin nálgist brátt. Það veitir mér gleði og góða tilfinningu í jólahjartað. Einnig falleg kórtónlist og ilmur af mandarínum og piparkökum. Hin eina og sanna jólalykt, ilmurinn af heimagerðu rauðkáli hjá mömmu á aðfangadag er það sem endanlega kemur mér í jólaskap, skyldi það ekki hafa látið sjá sig.“

Hvað er ómissandi yfir hátíðirnar?

- Auglýsing -

„Það eina sem er ómissandi yfir hátíðarnar, að mínu mati, er fjölskyldan. Samvera, kertaljós, góður matur, afslöppun og ró með fjölskyldunni gefa sönn jól í hjarta. Svo verður að segjast að heimabakaðar smákökur eru líka alveg ómissandi – enda tilvalin samverustund að sameinast yfir jólabakstri og maula svo lystisemdirnar yfir heitu súkkulaði.“

Myndir / Heiðdís Guðbjörg Gunnarsdóttir

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Deila

Nýtt í dag

Mest lesið í vikunni

Í fréttum er þetta helst...

- Auglýsing -