Eitt af furðulegri dómsmálum síðari tíma fór í gegnum Landsrétt á dögunum. Indverska prinsessan og söngkonan Leoncie herjaði þar á Helga Jónsson, eiganda Glatkistunnar sem heldur úti ómetanlegum fróðleik um tónlist og fólk henni tengt. Í kafla um Leoncie sagði meðal annars að hún hefði starfað sem nektardansmær. Þá var fróðleiksmoli um að tónlistarkonan hefði fengið að gjöf nærbuxur frá Jóni Baldvin Hannibalssyni, þáverandi formanni Alþýðuflokksins. Naríurnar voru merktar Alþýðuflokknum og var lýsing á því að söngkonan hefði íklæðst þeim í sjónvarpsþætti fyrir margt löngu.
Leoncie fór í meiðyrðamál við Helga þar sem tíundað var að hún væri í dag guðrækin kona og umfjöllunin væri meiðandi. Hún sagði skrifin hafa skaðað feril sinn og hún hefði þurft að leita til sálfræðings. Dómsmálið tapaðist á tveimur dómsstigum. Í Landsrétti var niðurstaðan sú að það sem Glatkistan geymdi í málinu væri byggt á gögnum sem ekki yrðu véfengd.
Málið er dæmigert fyrir tilefnislitlar lögsóknir. Það var sá umdeildi lögmaður, Ómar Valdimarsson, sem rak málið í gegnum tvö dómstig og tapaði því. Hann fær þó væntanlega sína umbun úr hendi söngkonunnar …