Ríkisstjórnin er sumpart lifandi dauð eftir stjórntök Svandísar Svavarsdóttur matvælaráðherra sem með einu pennastriki bannaði hvalveiðar og svipti á annað hundrað manns lifibrauði sínu. Bjarni Benediktsson, formaður Sjálfstæðisflokkins, hefur fátt sagt um aðgerð ráðherrans en er kokhraustur og virðist reyna að gera allt sem mögulegt er til að halda friðinn og þar með eigin ráðherrastóli. Minni spámenn í þingflokki Sjálfstæðisflokksins eru aftur á móti trylltir af bræði og vilja slíta samstarfinu. Sáttaviðræður eru að tjaldabaki milli VG og Sjálfstæðisflokks. Fallist Svandís ekki á afturhvarf til hvalveiða fer allt í bál og brand.
Það liggur í loftinu að Svandís verði svínbeygð og hún muni láta af hvalræðinu og ekki framlengja bannið eftir 1. september. Þannig má forðast það uppnám sem fylgir kosningum þar sem báðir flokkarnir eru að mælast langt undir kjörfylgi og niðurlæging blasir við ef gengið verður til kosninga strax. Aftur á móti blasir við að allar tilraunir til að halda áfram samstarfinu eru því marki brenndar að trúnaðarbrestur er orðinn hlutur. Vantraust og óeining svífur yfir vötnum ríkisstjórnarinnar eftir upphlaup undanfarinna missera. Sumir spá því að ríkisstjórnin lifi ekki út árið …