Samfélagsmiðlastjörnunni og gleðigjafanum Evu Ruzu Miljevic er ýmislegt til lista lagt. Það má sjá í myndbandi sem Eva Ruza deilir á Facebook, en þar spreytir hún sig á laginu I love Rock N’ Roll og sýnir svo ekki verður um villst að stelpan kann að syngja!
„Ég held alveg lagi,“ segir Eva Ruza í samtali við Séð og Heyrt og skellir upp úr, þegar hún er spurð út í videóið. „Læt alla vega ekkert stoppa mig í að syngja,“ bætir hún hlæjandi við, en um er að ræða 17 ára gamla upptöku úr Söngakeppni Menntaskólans í Kópavogi þar sem Eva Ruza og Regína Diljá Jónsdóttir vinkona hennar kepptu með lagið I Love Rock N’ Roll úr smiðju The Arrows. Eva Ruza deilir myndbandinu á Fcaebook í tilefni af afmæli Regínu Diljár.
„Við lögðum mikið metnað í atriðið,“ rifjar hún upp og brosir að tilhugsuninni. „Fengum vespuna hans pabba lánaða og Siggi, maðurinn minn, fékk stóran vinnubíl lánaðan til að ferja fákinn niður eftir fyrir okkur. Við þurftum alveg spes leyfi til að fá að koma með vespuna inn í húsið út af eldhættu, en keppnin fór fram í gamla Austurbæjarbíó á Snorrabraut.“
Þrátt fyrir mikinn metnað er skemmst frá því að segja að atriðið hlaut ekki náð fyrir augum dómnefndar. „Nei, við náðum ekki einu sinni einu af efstu sætunum, sem er bara dómaraskandall. Miðað við undirbúning og þrotlausar æfingar var það mikill skellur,“ segir Eva Ruza og hlær.
Eftir á hyggja segir hún að hugsanlega eigi þessi hrikalega ósanngjarna niðurstaða sér þó skýringu. „Við náðum aldrei að starta vespunni þannig að við þurftum að ýta okkur inn á sviðið,“ játar hún. „Það hefur kannski verið stóri faktorinn í því að sigurinn varð ekki okkar.“
Myndbandið má sjá á Facebook-vegg Evu Ruzu.