Nú þegar helgin bankar upp á er vert að skoða hvað verður um að vera á landinu.
Húnavaka verður haldin 14.-17.júlí, á Blönduósi. Hátíðin er haldin í nítjánda skipti og verða fjölbreytt skemmtiatriði fyrir alla aldurshópa.
Íbúar Húnabyggðar skreyta hús sín og garða með alls konar kynjaverum fyrir hátíðina. Verðlaun verða veitt fyrir best skreytta húsið, frumlegustu og flottustu fígúruna og fyrir götuna með flestar fígúrur.
Föstudaginn 15.júlí verður opið hús í Textíl Lab að Þverbraut 1.
Flugklúbbur Blönduóss mun bjóða upp á útsýnisflug alla helgina ef verður leyfir. Á föstudagskvöldinu verða glæsilegir tónleikar aftan við íþróttamiðstöðina á Blönduósi.
Laugardagurinn 16. júlí er svo hápunktur hátíðarinnar en þá fer fram golfmót á Vatnahverfisvelli, opið mót í ólympísku skeet verður á skotsvæði Markviss og árlegt Blönduhlaup USAH. Meðal dagskráliða yfir daginn verða tónleikar í Blönduóskirkju, útsýnisflug, fjölskyldudagskrá, tívolí, markaður, fótboltaleikur, kótelettukvöld, brekkusöngurog margt fleira. Dagurinn endar á balli með hljómsveitinni Á móti Sól í Félagsheimilinu.
Sunnudaginn 17. júlí verður froðurennibraut í brekkunni fyrir neðan kirkjuna, Stofutónleikar í Heimilisiðnaðarsafninu og fleira.
Frekari upplýsingar um hátíðarhöldin og dagskrá Húnavöku 2022 er að finna á Facebook síðu.