Big Bang stjarnan Kaley Cuoco er stödd í Reykjavík um þessar mundir. Sást hún í gær við tökur á horni Skólavörðustígs og Laugavegar.
Fréttablaðið sagði frá þessu í gær. Samkvæmt Fréttablaðinu er hún stödd hér á landi vegna upptöku á HBO þáttunum The Flight Attendant en hún er í aðalhlutverki. Þar leikur hún kærulausa og drykkfellda flugfreyju sem vaknar eftir skrautlega nótt á hótelherbergi með lík manns við hlið sér. Hún man ekki almennilega eftir nóttinni og þarf að reyna að púsla saman atburðarásinni. Hún fer síðan að efast um sakleysi sitt. Um 50 manns vinnur við tökurnar.
Leikkonan skemmtilega hefur verið dugleg að setja inn myndir á Instagram og virðist skemmta sér drottningalega á Íslandi. Sagðist hún í viðtali við People vera afar spennt fyrir Íslandsförinni. Á Instagram má sjá að þegar hún var ekki í tökum fór hún ásamt vinum sínum á Domino´s Pizza og á Aktu Taktu. „Pissuðum á okkur af hlátri,“ sagði Kaley á Instagram.
Mynd: Instagram