Kvikmyndaverið Paramount vinnur nú að gerð myndarinnar Summer Lovin’ þar sem rakin verður forsaga atburðanna í hinni goðsagnakenndu kvikmynd Grease. Summer Lovin’ verður einnig söngvamynd og söguþráður hennar er sagður fylgja þeim atburðum sem lýst er í laginu Summer Nights – þar sem segir frá fyrstu kynnum aðalsöguhetjanna Danny og Sandy – nokkuð nákvæmlega. Leikstjóri verður Brett Haley en handritið er skrifað af Leah McKendrick.
Í Grease er þessum fyrstu kynnum Sandy, sem Olivia Newton-John leikur, og Danny, sem leikinn er af John Travolta, einungis lýst í texta lagsins en nú þykir sem sagt tímabært að útfæra þau samskipti á hvíta tjaldinu. Paramount er jafnframt sagt vera að íhuga hvort ekki sé grundvöllur fyrir því að gera framhaldsmyndaflokk um það sem gerist í lífum þeirra Sandy og Danny áður en atburðirnir í Grease eiga sér stað.
Auk þessara kvimyndapælinga Paramount er sjónvarpsstöðin HBO einnig sögð vinna að sjónvarpsþáttaröð um söguhetjurnar úr Grease sem hotið hefur nafnið Grease: Rydell High.
Leikarar og væntanlegur útgáfutími fyrir bæði kvikmyndina og sjónvarpsþættina verður tilkynnt í samstarfi Paramount og HBO í fyllingu tímans.