Aðili sem starfar í ferðaþjónustu á gosstöðvunum í Geldingadal greindist með COVID-19. Var hann eini aðilinn sem greindist í gær sem var utan sóttkvíar. Aðrir fimm greindust í gær, en voru þeir allir í sóttkví.
Biðlar Þórólfur Guðnason, sóttvarnarlæknir til fólks að vera ekki að ganga upp að gosinu að svo búnu.
Þórólfur segir í samtali við RÚV það vera mikilvægt að fari fólk upp að gosstöðvunum þurfi það að gæta ítrustu varkárni. Nauðsynlegt sé að gæta sín að vera ei að hópast saman, né fara í stórum hópum upp að gosinu. „Við sjáum hvernig þetta er á leiðinni inn að gosstöðvunum, allir snertandi sama reipið til að komast upp brekkuna. Ég myndi telja að það væri töluverð sýkingar- og smithætta af þessu ferðum öllum inn á gosstöðvarnar eins og staðan er núna,“ segir Þórólfur.
Eins og sagt hefur verið frá í fréttum hefur gífurlegur fjöldi fólks lagt leið sína upp að gosstöðvunum undanfarna daga og eins og sjá má á myndum frá svæðinu virðist fólk oft á tíðum ganga ansi þétt. Segir Þórólfur þetta vera áhyggjuefni.