„Kórónuveiran lifir ekki nema 30 sekúndur í sundlaugum. Þetta hef ég lengi vitað,“ skrifar Illugi Jökulsson á Facebook síðu sinni og deilir grein af norsku fréttaveitunni Aftenposten.
Í greininni kemur fram að samkvæmt nýjum rannsóknum á vegum veirufræðinga við Imperial College í London, getur sundlaugarvatn, við réttar aðstæður, drepið kórónuvírusinn.
Þetta bendir til að smithætta í sundlaugum sé afar lítil.
Rannsóknin sýndi að 1,5 milligramm af klóri per líter, með pH gildi á milli 7-7,2 dró meira en 1000 falt úr smithættu vírussins á innan við 30 sekúndum.
„Þessar niðurstöður ásamt þeirri staðreynd að ólíklegt sé að vírusinn komist í sundlaugina með sýktri manneskju, bendir til þess að líkurnar á því að smitast af Covid-19 í sundi séu hverfandi,“ segir prófessor Wendy Barclay við Imperial College.
Þetta eru gleðitíðindi, en frá og með deginum í dag var Íslendingum aftur kleift að skella sér í sund, vegna tilslakana stjórnvalda í sóttvörnum.
Sundstöðum er þó aðeins heimilt að taka á móti 50% af þeim fjölda sem rekstrarleyfi þeirra segir til um. Börn sem fædd eru 2015 og síðar, teljast ekki með.
Núverandi reglugerð gildir til 7. maí.