Anna Svava Knútsdóttir hlýtur þann heiðurstitil að vera afmælisbarn dagsins hjá Mannlífi. Þessi drepfyndna og hæfileikaríka leikkona er 45 ára í dag.
Anna Svava er þekktur senuþjófur en hún hefur ávalt slegið í gegn í þeim verkum sem hún hefur tekið að sér, hvort sem um er að ræða uppistönd, hlutverk í áramótaskaupum eða í sjónvarpsþáttum á borð við Ligeglad og Verbúðin. Ísbúðin sem hún opnaði árið 2013, Valdís, sló einnig aldeilis í gegn hjá ísþyrstum landanum.
Blaðamaður Mannlífs hringdi í Önnu Svövu sem er stödd á Tenerife þessa dagana, og spurði hana hvort og þá hvernig hún ætlaði að halda upp á afmælið.
„Heyrðu já, ég fékk barnlausan dag í afmælisgjöf. Ég er á Tenerife núna en ég bý á Spáni núna. Þannig að ég ætla að fagna deginum með vinkonu minni, við ætlum að fara í búðir og á kaffihús og eitthvað fleira,“ sagði Anna Svava og hljómaði mjög sátt við gjöfina. Aðspurð hvort hún væri flutt á Tenerife, sagðist hún ekki svo vera en hún væri flutt til Spánar tímabundið en þar væri búið að rigna í þrjár vikur þannig að ákveðið var að skella sér til Tenerife.
En er eitthvað á döfinni hjá Önnu Svövu á næstunni?
„Nei, að hringir örugglega einhver einhverntíman í mig bara,“ svaraði Anna Svava hlæjandi og bætti við: „Það kemur alltaf eitthvað, ég er bara ekkert að spá í framtíðinni.“
Mannlíf óskar Önnu Svövu innilega til lukku með daginn!