Arnaldur Bárðarson hefur nú sagt af sér formennsku í Prestafélagi Íslands; hefur einnig sagt sig úr félaginu.
Þetta staðfesti Arnaldur í spjalli við Fréttablaðið – en hann opinberaði afsögn sína í gærmorgun:
„Ég tel Prestafélagið ekki vera í standi til að gæta hagsmuna minna sem stéttarfélag,“ segir hann spurður um ástæðu afsagnarinnar.
Fram hefur komið að Félag prestvígðra kvenna hefur krafist afsagnar Arnaldar; en Arnaldur hafði áður sagt að hann myndi ekki segja af sér.
Arnaldur hefur sætt mikilli gagnrýni eftir ummæli um mál séra Gunnars Sigurjónssonar í viðtali á Útvarpi Sögu; það gerði hann áður en skýrsla óháðs teymis kirkjunnar, sem rannsakað hafði mál Gunnars í marga mánuði, var gerð opinber.