Töluvert mikið var að gera hjá Lögreglunni á höfuðborgarsvæðinu í gærkvöldi og nótt en voru 45 mál skráð í málaskrá lögreglu frá kl 19:00 til 05:00. Fimm manns gistu í fangaklefa.
Rétt fyrir átta í gærkvöldi barst lögreglunni tilkynning um líkamsárás í hverfi 108. Af fimm mönnum voru tveir fluttir á bráðamóttöku Landspítalans en ekki er vitað um alvarleika áverka að svo stöddu. Þá voru hinir þrír fluttir í fangaklefa.
Um tíu leytið var tilkynnt um aðra líkamsárás. Meiðsli voru minni háttar en lögregla handtók einn mann í sambandi við málið.
Í Breiðholti var bæði tilkynnt um líkamsárás og slagsmál í gærkvöldi.
Þegar lögregla kom á vettvang þar sem slagsmálin áttu sér stað var enginn slasaður en fíkniefni fundust á einum aðila.
Líkamsárásin átti sér stað rétt fyrir klukkan tíu í gærkvöldi en árásin reyndist svo vera heldur óvanaleg. Þegar lögregla mætti á staðinn kom í ljós að hópur ungmenna hafði gert dyraat og húsráðandi hlaupið stúlku uppi sem hann hélt þar til lögreglan mætti. Hrekkjalómurinn var í klóm húsráðandans. Dyraataið endaði því með uppnámi. Upplýsingar voru skráðar og málið tilkynnt til Barnaverndar.
Auk þess var kveikt var í tveim pappagámum í Breiðholti. Sókudólgurinn fannst ekki en um minniháttar skemmdir var að ræða.
Í Mosfellsbæ hafði lögregla afskipti af manni sem hafði lent í umferðaróhappi. Reyndist maðurinn vera undir áhrifum áfengis og fíkniefna. Maðurinn gisti í fangageymslu í kjölfarið.
Þá afgreiddi lögregla nokkur minniháttar mál á vettvangi, um er að ræða þjófnað úr verslun, grunsamlegar mannaferðir og ölvun.