Sjarmörinn og fyrrum fjórfaldi James Bond, stórleikarinn Pierce Brosnan, vakti heldur betur athygli fyrir glæsilegan og afar litríkan klæðnað er hann mætti á frumsýningu kvikmyndarinnar Black Adam.
Hinn 69 ára gamli og síungi Brosnan er með glæsilegustu karlmönnum veraldar, og hann veit alveg af því – enda varla annað hægt. Myndir og speglar bera sönnur á það.
Brosnan mætti í bleikum jakkafötum á frumsýningu myndarinnar, og stal senunni svo gjörsamlega að hún hefur ekkert fundist síðan þrátt fyrir mikla leit.
Brosnan er augljóslega með puttann á tískupúlsinum – en eins og flestir ef ekki allir vita þá hefur bleiki liturinn verið afar áberandi í tískuheiminum; sem betur fer – enda hressir liturinn upp á tilveruna sem á það til að vera grá.
Brosnan í bleiku lýsir upp tilveruna – um stundarsakir að minnsta kosti.