Ferðamaður var bitinn af hákarli við strendur Long Island í vikunni, einungis nokkrum klukkustundum eftir að einstaklingur á brimbretti varð fyrir árás á sama svæði. Þar með hafa verið fimm hákarlaárásir í New York á einungis tveimur vikum.
Á vef The Sun kemur fram að brimbrettamaðurinn Shawn Donnely kastaðist af bretti sínu þegar Tígurháfur réðist á hann undan ströndum Smith Point Beach á miðvikudag.
„Hann náði í vinstri kálfann á mér. Þegar ég var að detta af brettinu sá ég uggann og bakið á honum.“ Bit hákarlsins á kálfa Donnely skildi eftir sig rúmlega tíu sentímetra sár. Honum tókst að koma sér í land með næstu öldu.
Síðar þennan sama dag var ferðamaður að vaða í sjónum við Seaview ströndina þegar hákarl réðist á hann. Samkvæmt lögreglu á svæðinu kom hákarlinn aftan að ferðamanninum og beit hann í vinstri úlnlið og rasskinnar. Maðurinn gat gengið en var þó flogið á spítala vegna meiðslanna, sem voru ekki lífshættuleg.
Tveir lífverðir sem voru við störf á nærliggjandi ströndum urðu einnig fyrir hákarlaárásum fyrr í mánuðinum. Annar þeirra, Zach Gallo, var við æfingar á Smith Point Beach þegar hann var bitinn sunnudaginn 3. júlí. Hann hafði verið í hlutverki einstaklings í háska í sjónum á æfingunni þegar hann fann fyrir snörpum sársauka. Hann sagðist hafa fundið gúmmíkennda áferð og þannig áttað sig á því að hann væri í návist hákarls. Hann kýldi hákarlinn til þess að verjast árásinni og komst í land.
Þann 7. júlí var annar lífvörður, John Mullins, við æfingar á nærliggjandi strönd þegar hann varð fyrir árás hákarls.
Annar maður hlaut sár eftir kynni við hákarl þann 30. júní síðastliðinn þegar hann var að synda við Jones Beach.
Á miðvikudag var sund bannað við Smith Point Beach vegna hættulegra sjávardýra.