Erlingur Ragnar Lúðvíksson húsasmíðameistari og slökkviliðsmaður fæddist í Reykjavík 6. júní 1939. Hann lést á lungnadeild Landsspítalans 7. janúar 2021. Erlingur var aðalvarðstjóri hjá Slökkviliðinu í Reykjavík og í tugi ára var hann afar farsæll í einu mikilvægasta starfi samfélagsins. Þá var hann landsliðsmaður í handknattleik og lék með liðinu á stórmóti. Greint er frá andláti þessa merka manns í Morgunblaðinu.
Erlingur var 15 ára þegar hann settist á skólabekk til að læra húsasmíði hjá Bjarna Ólafssyni í Laugarnesskóla. Erlingur var á unglingsaldri, aðeins 16 ára, þegar ástkær bróðir hans, Einar Guðgeir Þorbjörnsson, lést af slysförum, þá rétt um tvítugt. Hafði bróðurmissirinn djúpstæð áhrif á Erling sem nú þurfti að axla mikla ábyrgð vegna fjölskylduaðstæðna. Erlingi er lýst sem nagla af gamla skólanum af samstarfsfólki hjá slökkviliðinu en hafi verið með hjarta úr gulli. Þá var Erlingur mikill fjölskyldumaður, duglegur, kraftmikill og ósérhlífinn.
Erlingur var giftur Jakobínu Ragnheiði Ingadóttur. Þau eignuðust þrjú börn, Inga Einar, Elvar Örn og Björg Rögnu.
Þá reyndust Bjarni og Kristilegt félag ungra manna, KFUM, klettar Erlings á erfiðum tímum. Alla tíð eftir það átti KFUM stað í hjarta Erlings og Vatnaskógur var einn hans griðastaða en þar hafði hann dvalið heilt sumar. Þá æfði Erling knattspyrnu og handbolta með Fram og ÍR og vann mikið í félagsmálum íþróttafélaganna. Þá var hann um tíma sem vallarstjóri í Kópavogi.
Erlingur gekk í slökkvilið Reykjavíkur árið 1968 og þar starfaði hann í hvorki meira né minna en 35 ár eða til ársins 2003. Erlingur var frábær íþróttamaður og lék knattspyrnu með Fram og handknattleik með ÍR. Til marks um hæfileika hans í handknattleik, þá lék hann með Íslenska landsliðinu á heimsmeistaramóti.
Börn Erlings; Ingi, Elvar og Björg, segir í minningargrein um föður sinn:
„Pabbi talaði ekki illa um nokkurn mann né niður til, hann kenndi okkur réttsýni, vinnusemi, hjálpsemi, dugnað og ekki síst seiglu. Pabbi var sterkur karakter sem gott var að treysta á og hafa í sínu liði,“ segir Sólveig og bætir við á öðrum stað:
„Pabbi var farsæll slökkviliðsmaður, öflugur reykkafari og sinnti jafnframt þjálfun á því sviði hjá slökkviliðinu, síðar varð hann varðstjóri. Hann skipulagði verk, undirbjó, hélt mannskap að verki og vann alltaf á fullu sjálfur bæði í slökkviliðinu og smíðinni. Við minnumst þess vel hve einbeittur hann var og tilbúinn að takast á við hver þau verkefni sem biðu á komandi vakt.“
Þá kemur fram að þegar taka þurfti stórar ákvarðanir hafi oft verið leitað til Erlings. Dæmi um það er þegar Kringlan var byggð og síðar Smáralind skipuðu yfirmenn Slökkviliðsins hann til sérstakra starfa á þeim vettvangi; að gæta þess að reglum um brunahönnun og eldvarnaöryggismál í þeim byggingum væri fylgt.
Fjölmargir minnast Erlings og segja. Ársæll Aðalbergsson og Ólafur Sverrisson fyrir hönd KFUM skrifa:
„Margir eiga góðar minningar um þátttöku í starfi KFUM í gegnum tíðina. Einn þeirra var Erlingur Lúðvíksson. Hann kynntist ungur starfi KFUM. Þar hitti hann meðal annars þá Árna Sigurjónsson og Bjarna Ólafsson sem voru leiðtogar í starfinu í Reykjavík. Þeir létu sér annt um drengina sem sóttu fundi hjá þeim og lauk þeirri væntumþykju ekki þegar fundunum lauk. Þess fékk Erlingur að njóta þegar hann þurfti þess með. Meðal annars sáu þeir Árni og Bjarni til þess að Erlingur fékk að vera heilt sumar í Vatnaskógi þegar aðstæður heima voru ekki sem bestar fyrir ungan dreng.
Skógarmenn KFUM þakka Erlingi allt gott og senda fjölskyldu hans innilegar samúðarkveðjur.“
Jón Viðar Matthíasson, slökkviliðsstjóri Slökkviliðs höfuðborgarsvæðisins skrifar um vin sinn og fyrrverandi samstarfsfélaga.
„Erlingur var fæddur að sumri árið 1939, þegar fyrirferð var ekki mikil við hátíðahöld Íslendinga frekar en í hversdeginum og var af nægjusamari kynslóð en við sem yngri erum. Árið 1939 stóð heimsbyggðin á þröskuldi heimsstyrjaldar sem leiddi af sér hörmungar og höft á frelsi fólks. Að vissu leyti kveður Erlingur samfélag mannanna því á keimlíkum stað og það var þegar jarðvist hans hófst, þrátt fyrir hinar miklu samfélagslegu breytingar sem hafa átt sér stað á æviskeiði hans.“
Þá segir Jón Viðar einnig: „Elli, eins og við kölluðum hann, stjórnaði vaktinni sinni af festu. Þar var allt á hreinu og allir tilbúnir í útkallið þegar kallið kom og fékk ég að kynnast því að starfa við hlið hans á vettvangi og það oft við mjög krefjandi aðstæður. Elli hugsaði einnig mjög vel um vaktina sína og náði það langt út fyrir veggi slökkviliðsins.“
„Á sínum tíma sinnti Elli einnig verklegri þjálfun slökkviliðsmanna,“ segir Jón Viðar.
Erling tók ötulan þátt í að rækta samband slökkviliðsmanna við kollega í Þýskalandi. Ásamt öðrum stóð hann m.a. fyrir því að sumarbústaðir fyrir BSRB væru smíðaðir á planinu hjá slökkviliðinu í Skógarhlíð til þess að fjármagna heimsókn Þjóðverjanna til Íslands. Jón Viðar segir að lokum:
„Við minnumst Ella með hlýju, hann var traustur vinur, leiðtogi og lærifaðir yngri starfsmanna og mjög oft vitnað í hann þegar leysa þurfti flókin verkefni. Hans verður sárt saknað.
Um leið og ég þakka Erlingi samfylgdina og þjónustu hans við íbúa höfuðborgarsvæðisins votta ég Jakobínu, börnum þeirra og öðrum ástvinum mína innilegustu samúð.“