Lögreglan á Vestfjörðum greinir frá því að alvarlegt umferðaslys hafi átt sér stað skömmu eftir klukkan fimm nú síðdegis á norðanverðri Steingrímsfjarðarheiði. Ökumaðurinn virðist á lífi en þyrla Landhelgisgæslunnar er nú á vettvangi og mun flytja hann til Reykjavíkur.
Tilkynning lögreglunnar í heild sinni:
Lögreglunni á Vestfjörðum barst laust fyrir kl. 17 tilkynning um umferðarslys á norðanverðri Steingrímsfjarðarheiði sem liggur milli Steingrímsfjarðar og Ísafjarðardjúps. Viðbragðsaðilar fóru þegar á vettvang. Bifreið hafði oltið út af veginum og var ökumaður einn í bifreiðinni. Þyrla Landhelgisgæslunnar er nú á vettvangi og mun flytja ökumanninn til Reykjavíkur. Nánari upplýsingar liggja ekki fyrir að svo stöddu. Vegurinn er ekki lokaður vegna slyssins.