Að sögn bæjarstjóra Reykjanesbæjar er ráðningamál Leifs Garðarssonar í ferli hjá Stapaskóla. Foreldrafélög skólans sendu áskorun til skólastjórnenda á mánudaginn þar sem þeir voru hvattir til að endurskoða ráðningu Leifs.
Í samtali við Mannlíf sagði Kjartan Már Kjartansson að mál Stapaskóla væri í ferli í skólanum. „Sko, málið er í höndum skólastjóra Stapaskóla og á þessu stigi vil ég ekki tjá mig eða upplýsa um málið, ég fylgist með þessu en er ekki beinn aðili að því.“ Aðspurður hvort það væri rétt sem heimildir Mannlífs herma að fundur hafi verið haldinn vegna málsins segir Kjartan svo vera. „Já það er örugglega búið að halda marga fundi um þetta. Ég hef setið einn slíkan, bara sem áheyrandi. Þar voru engar ákvarðanir teknar eða neitt slíkt. Málið er bara í vinnslu eins og maður segir og ég þori ekkert að segja til um lyktir þess.“
Sjá einnig: Leifur Garðars ráðinn sem deildarstjóri unglingadeildar Stapaskóla: „Fólk var varla að trúa þessu“