Dómsmálaráðuneytið hefur ekki svarað fyrirspurnum Mannlífs um fund saksóknara Namibíu og Brynjars Níelssonar, sem fram fór í dómsmálaráðuneytinu.
Í gær sendi Mannlíf tölvupóst á dómsmálaráðuneytið, Katrínu Jakobsdóttur forsætisráðherra og Þórdísi Kolbrúnu Reykfjörð Gylfadóttur utanríkisráðherra þar sem beðið var um minnisblað frá fundi sem Brynjar Níelsson, aðstoðamaður dómsmálaráðherra, átti með saksóknara Namibíu í dómsmálaráðuneytinu. Brynjar hefur ekki viljað segja frá innihaldi fundarins en opinberlega hefur hann sagt að um óvænta heimsókn hefði verið að ræða en ekki formlegan fund.
Sjá einnig: Brynjar neitar að upplýsa um leynifund sinn með saksóknara Namibíu: „Shit, hvað þú ert lame“
Í tölvupósti Mannlífs er auk beiðninnar um minnisblaðið nokkrar spurningar sem ráðuneytið er beðið um að svara, með vísun í upplýsingalög. Spurningarnar eru eftirfarandi:
1. Hver var tilgangur fundarins?
2. Bar mál gegn Samherja á góma á fundinum?
3. Hverjir voru nákvæmlega viðstaddir fundinn?
4. Hvernig stóð á að fundurinn var haldin? Hver bað um fundinn?
5. Hversu lengi stóð hann yfir?
Var ráðuneytinu gefinn frestur til dagsins í dag en enn hefur ekkert svar borist. Mannlíf mun segja frá því er svör berast.