Samkvæmt dagbók lögreglunnar á höfuðborgarsvæðinu var nokkuð um það að ökumenn væru stöðvaðir í gærkvöldi og nótt vegna ölvunaraksturs eða akstur undir áhrifum annarra efna.
Þannig var ökumaður stöðvaður í Hlíðahverfi í Reykjavík, grunaður um akstur undir áhrifum fíkniefna. Í ljós kom að sá hinn sami hafði verið sviptur ökuréttindum vegna fyrri afskipta lögreglu. Einn ökumaður var grunaður um akstur undir áhrifum bæði áfengis og fíkniefna. Sá er einnig grunaður um að hafa fíkniefni í fórum sínum.
Lögreglan á höfuðborgarsvæðinu gerði í gær athugasemdir við forsvarsmenn fjögurra fyrirtækja auk eins einstaklings. Ástæðan var sú að þeir höfðu allir gleymt að taka íslenska fánann niður fyrir miðnætti. Öllum var þeim gert að taka fánann niður, líkt og lög kveða á um.