Síðastliðinn sunnudag gaf fjölskylda Núma Magnússonar út lagið Númi. Hlusta má á lagið hér fyrir neðan en það er fréttavefurinn Trölli.is sem greinir frá þessu.
Númi hefði orðið fertugur í ár en hann tók sitt eigið líf annan janúar 2015. Fjölskylda hans vill með útgáfu lagsins benda fólki á Píeta samtökin og þeirra góða starf. Samtökin reyna að aðstoða fólk sem er með sjálfsvígshugsanir og þannig koma í veg fyrir harmleik.
Lagið Númi er samið af Magnúsi G. Ólafssyni en textinn er eftir systur Magnúsar, Guðrúnu Pálínu Jóhannsdóttur. Í texta lagsins segir meðal annars:
„Enga von þú sást handan við hornið, villu vega leiddu skuggarnir þig. Fastur í þínu eigin dimma hugskoti, og lævísar raddirnar grófu um sig.”
Í lýsingu við myndbandið segir enn fremur: „Ef einhver hefur þessar hugsanir eða hefur liðið eins og Núma okkar, hringdu í Píeta samtökin núna og fáðu hjálp í síma 552 2218.“