Forstöðumaður Sundlaugar Húsavíkur var rekinn úr starfi sínu eftir að hafa aðeins gegnt því í örfáa daga. Sveitastjórnin ákvað þá að draga ráðninguna til baka eftir að kvartað hafði verið undan forstöðumanninum að virða ekki mörkin í samskiptum kynjanna.
Samkvæmt Fréttablaðinu er búið að auglýsa starfið á nýjan leik. Staðgengill sveitastjóra, Drífa Valdimarsdóttir, staðfestir að íbúar sveitarfélagsins hafi kvartað undan ráðningu forstöðumannsins en ítrekar að sveitarfélagið hafi fylgt öllum lögbundnum ferlum.
„Við ákváðum að ganga ekki frá ráðningu við þennan aðila og auglýsa starfið aftur. Það var allt gert rétt í þessu ferli. Svo kemur upp ábending og við brugðumst við,“ sagði Drífa í samtali við Fréttablaðið.
Ástæða uppsagnarinnar er sögð vera að viðkomandi forstöðumaður hafi ítrekað ekki virt mörk í samskiptum kynjanna, án þess að hafa nokkurn tímann verið kærður.