Ýmsir þjóðþekktir Íslendingar létu hörð ummæli falla í vikunni.
„Verði gengið að kröfum um meiri launahækkanir en samið var um í lífskjarasamningnum þá er friðurinn úti á vinnumarkaðnum í heild sinni.“
Þórir Guðmundsson, ritstjóri fréttastofu Stöðvar 2, Vísis og Bylgjunnar.
„101 Reykjavík liðið sem stýrir borginni á ekki Elliðaárdalinn.“
Vigdís Hauksdóttir, borgarfulltrúi Miðflokksins, um fyrirhugaðar byggingarframkvæmdir í Elliðaárdal.
„Gefur hreinlega í skyn að foreldrar séu að dópa börnin sín.“
ADHD-samtökin hafa sent frá sér yfirlýsingu vegna viðtals við Andrés Magnússon, yfirlækni hjá Embætti landlæknis, í viðtali í fréttatíma Stöðvar 2, þar sem læknirinn ræddi mikla notkun ADHD-lyfja hérlendis.
„Hvað er sterkur leiðtogi? Er það kallakallinn sem aldrei hlustar? Er það kallakallinn sem passar að enginn komist að nema hann? Hvað er sterkur leiðtogi?“
Helga Vala Helgadóttir, þingmaður Samfylkingarinnar, kemur formanni Samfylkingarinnar, Loga Einarssyni, til varnar vegna umfjöllunar Fréttablaðsins um gengi flokksins, þar sem fram kemur að einhverjum innan hans þykir formaðurinn ekki nógu sterkur.
„Við erum að sigla inn í tíma þar sem nýsköpun verður að leika miklu stærra hlutverk í verðmætasköpun landsins. Störf sem byggja á henni geta líka skipt miklu máli í að byggja upp fjölbreytt störf um allt land. Ég átta mig ekki á hvernig í ósköpun það að leggja niður Nýsköpunarmiðstöð getur verið liður í því.“
Logi Einarsson, formaður Samfylkingarinnar, furðar sig á þeirri ákvörðun Þórdísar Kolbrúnar Reykfjörð Gylfadóttur nýsköpunarráðherra að ætla að leggja niður Nýsköpunarmiðstöð Íslands um næstu áramót.
„Skuld Stöðvar 2 við sannleikann og réttlætið er mikil, ekki síst gagnvart barninu sem er hið eiginlega fórnarlamb.“
Kristrún Heimisdóttir og hópur kvenna í aðsendri grein vegna ákvörðunar Stöðvar 2 um að leyfa Kolbrúnu Önnu Jónsdóttur, eiginkonu Ólafs Hand, að tjá sig í Íslandi í dag um mál sem enn er fyrir dómstólum.
„Ég verð að segja eins og er að þegar ég skoða þessar myndir koma alltaf sömu þrjú orðin upp í huga mér: Ljótt. Kuldalegt. Ömurlegt.“
Una Margrét Jónsdóttir dagskrárgerðarkona liggur ekki á skoðun sinni á íslenskum innanhússarkitektúr.
„Áætlunarflug til Tenerife ætti að leggja af og allir Íslendingar sem snúa heim þaðan ættu að vera sendir í sóttkví í Egilshöll.“
Inga Sæland, formaður og þingmaður Flokks fólksins.
„Gæti verið verri staður til að vera fastur á.“
Sigvaldi Kaldalóns, fararstjóri á Tenerife.