- Auglýsing -
Björn Birgisson gefur Vinstrihreyfingunni grænu framboði ráð í nýrri færslu á Facebook en nýlegar skoðanakannanir sýna flokkinn í sögulegri lægð.
Samfélagsrýnirinn frá Grindavík, Björn Birgisson skrifaði um Svandísi Svavarsdóttur matvælaráðherra í færslu í gær en tilefnið er pistill sem hún ritaði í Morgunblaðið. Segir Björn að pistill ráðherrans, þar sem hún telur upp það sem „uppskar“ á liðnum þingvetri, breyti ekki þeirri staðreynd að flokkur hennar, VG „mælist rétt yfir sársaukaþröskuldinum“. Gefur hann í kjölfarið VG ráð til að lifa af: Slíta stjórnarsamstarfinu.
Færsluna má lesa hér að neðan:
„Uppskera að loknum þingvetri.
Yfirskrift pistils sem Svandís Svavarsdóttir ritar í Morgunblaðið.
Upptalning ráðherrans breytir ekki þeirri staðreynd að uppskera VG að loknum þingvetri mælist rétt yfir sársaukaþröskuldinum og flokkurinn gæti allt eins horfið af þingi eftir næstu kosningar.
Eina leiðin fyrir VG til að bjarga sér er að rjúfa núverandi stjórnarsamstarf.
Það er hægt og bítandi að kæfa flokkinn.
Best væri fyrir hann að forða sér á meðan enn mælist eitthvert lífsmark.
Það væri algjört glapræði fyrir flokkinn að hanga í þessari ríkisstjórn út kjörtímabilið.“