„Svona athugasemdir koma á hverju ári. Við könnum auðvitað alltaf málið. Þessar athugasemdir snúa að þeim sms-atkvæðum sem hægt er að senda í gegnum appið, RÚV Stjörnur,“ segir Rúnar Freyr Gíslason, framkvæmdastjóri Söngvakeppninnar í skriflegri yfirlýsingu til fréttastofu Rúv.
Fram hafa komið ábendingar og kvartanir með kosningaapp RÚV. Skjáskot hafa verið birt af meintum galla í smáforritinu. Þar sem gerð var tilraun til að kjósa Bashar en kosninganúmer Heru Bjarkar hafi birst sjálfkrafa. Eins kom upp villumelding ef númer Bashars var slegið inn.
Hera Björk fór með sigur úr bítum í gærkveldi eftir einvígi við Bashar Murad.
Rúnar Freyr segir að engar kvartanir hafi borist vegna annarra kosningaleiða sem í boði voru. Jafnframt eru framleiðendur smáforritsins í samvinnu við forsvarsmenn keppninar að kanna hvort mistök hafi átt sér stað.
„En til að taka af allan vafa viljum taka fram að heildarfjöldi sms-atkvæðanna sem þessir tveir keppendur fengu, var ekki það afgerandi að það hefði haft áhrif á úrslitin,“ segir Rúnar Freyr.
Frekari upplýsinga um úrslit kosninganna og atkvæðafjölda gerðar opinberar við fyrsta tækifæri.