Vísitala íbúðaverðs á höfuðborgarsvæðinu hækkaði um 2,2 prósent á milli mánaðanna maí – júní. Fjölbýli hækkaði um 2,6 prósent en sérbýli einungis 0,8 prósent, sem er töluvert minni hækkun en verið hefur upp á síðkastið. Eftir nýjustu tölur af húsnæðismarkaði, frá Þjóðskrá, hefur Hagfræðideild Landsbankans sent út tilkynningu þess efnis að mælingar Þjóðskráar sé því ofar væntingum bankans. En eins og kunnugt er gefa bankarnir út verðbólguspár. Landsbankinn hækkar því verðbólguspá fyrir júlí um 0,1 prósent, úr 9,2 prósentum í 9,3 prósent.
Þá segir jafnframt í tilkynningunni frá bankanum: „Í síðustu viku gáfum við út spá um verðbólgu í júlí þar sem gert var ráð fyrir 0,5% hækkun á vísitölu neysluverðs milli mánaða og að verðbólga yrði 9,2% í júlí. Húsnæði hefur verið einn helsti drifkraftur verðbólgunnar síðustu mánuði og er hækkunin sem nú sést í gögnum Þjóðskrár um íbúðaverð á höfuðborgarsvæðinu til þess fallin að breyta skoðun okkar. Nú teljum við að vísitala neysluverðs muni hækka um 0,6% milli mánaða og að verðbólga muni mælast 9,3% í júlí en ekki 9,2%.“