Enn hefur leitin að Gunnari Svan Björgvinssyni, er hvarf af heimili sínu á Eskirði fyrir rúmum tveimur vikum síðan, engan árangur borið. Áfram verður leitað en beðið er eftir aðstoð þyrlu Landhelgisgæslunnar.
Samkvæmt frétt Austurfréttar staðfestir Þórhallur Árnason, aðalvarðstjóri, hjá lögreglunni á Austurlandi, við fréttamiðilinn en fjöldi fólks hefur leitað Gunnars. Bæði hafa viðbragðsaðilar á borð við lögregluna og björgunarsveitir tekið þátt í leitinni, og heimafólk sem hefur gert sitt til að finna Gunnar.
„Mikill fjöldi fólks og þungi hefur verið í leitinni hér um slóðir síðustu dagana og sérstaklega um liðna helgi. Nú bíðum við þyrlunnar frá Landhelgisgæslunni til aðstoðar en sú átti að vera hér á sunnudaginn var en hætt við það vegna bilunar. Vonandi verður hægt að fá hana til aðstoðar á næstunni. Menn hafa, meðal annars, tvívegis farið á vélsleðum út í Vöðlavík og leitað en ekkert komið út úr því og þá eru margir íbúar hér að rétta hjálparhönd við leitina svo það eru sannarlega allir angar úti,“ sagði Þórhallur í samtali við Austurfrétt.
Er Þórhallur er spurður hvort það sé öruggt að Gunnar Svan hafi horfið í nágrenni Eskifjarðar en ekki farið út landi af einhverri ástæðu, segir hann að það hafi verið kannað og að ekkert hafi komið fram sem gefi vísbendingar um að hann hafi farið úr landi.
Gunnar Svan er liðlega fertugur að aldri, grannvaxinn með áberandi sítt og brúnt hár. Allir sem geta gefið upplýsingar um ferðir Gunnars eru vinsamlega beðnir að hafa samband við lögregluna á Austurlandi annaðhvort í síma 444 0600 eða með tölvupósti á netfangið [email protected].