Illugi Jökullson fjölmiðlamaður deilir á Facebook-síðu sinni myndum af óeirðum stuðningsmanna Donald Trump þar sem sjá má mann halda á íslenska fánanum á áberandi hátt. Myndirnar eru frá Sacramento en það var ekki einungis í höfuðborginni sem Trumpistar létu öllum illum látum.
Mörgum er illa brugðið í athugasemdum við færslu Illuga. Sumir grínast að þarna sé talsmaður Útvarps Sögu eða Miðflokksins á ferð. Egill Helgason er einn þeirra sem er ekki skemmt yfir þessu. „Ha? Þetta er rosalegt. Þarfnast skýringa við,“ skrifar hann.
Illugi telur að þetta sé örugglega Íslendingur miðað við hvernig hann öskrar „Iceland“ á umræddu myndbandi. „Væntanlega er þarna einhver íslenskur stuðningsmaður Donald Trump. Ég vona að hann endi í bandarísku fangelsi næstu áratugina,“ skrifar einn Facebook-vinur Illuga meðan annar segir: „Þekkir einhver þetta gerpi? Er þetta íslenskt, eða bara einhver fáráður sem heldur að við séum æðri öðrum því við erum svo föl og langafar okkar sigldu á bátum til Grænlands?“
