Íbúar miðborgarinnar óttast krotfaraldur sem beinist að einkabifreiðum í hverfinu. Um helgina voru að minnsta kosti tveir bílar spreyjaðir með sama tákninu, tölustafnum 13, með áberandi hætti.
Í hópi hverfisbúa miðborgarinnar stofnar Júlía nokkur til umræðunnar og birtir þar mynd af bíl sem tölustafurinn 13 hefur verið spreyjaður á. Í kommentakerfinu bætast svo við fleiri myndir þar sem sama tala hefur verið spreyjað á fleiri bíla. Júlía segir í færslu sinni:
„Kannast einhverjir við að það sé verið að spreyja á bíla? Þetta blasti við í hádeginu,“ segir Júlía.
Elísa skilur ekkert í því hvað er í gangi í hverfinu. „What?! Ertu ekki að grínast?!,“ spyr Elísa.
Hrönn hefur orðið vitni að þessu bílakroti í miðbænum. „Var einmitt að reka augun í þennan sem er lagður á Grettisgötu – þetta er glatað,“ segir Hrönn.
Katrín hefur því miður orðið fyrir þessum eignaspjöllum og hefur tilkynnt þau til lögreglu. „Já okkar var spreyjaður alveg eins á húddið á föstudagsnótt eða seint á fimmtudag/snemma á föstudag. Tilkynntum eignaspjöll til lögreglu á netinu. Okkar var lagt á Snorrabraut við Grettisgötu,“ segir Katrín.