Hún var dýrkeypt ferðin á Barðaströnd síðastliðið föstudagskvöld en líka stórhættuleg og hafði í för með sér skert ferðafrelsi fyrir ökufantinn er sat undir stýri og spændi eftir þjóðveginum á 172 kílómetra hraða.
Vaskir lögregluþjónar gómuðu glannann eftir hraðamælingu og var hann tekinn höndum. Þá var hann sviptur ökuleyfi í fjóra mánuði og sektin sem beið ökuníðingsins fyrir ofsaaksturinn var 280 þúsund krónur.
Í skeyti lögreglunnar á Vestfjörðum segir:
„Að aka yfir leyfilegum hámarkshraða er stórhættulegt, dýrt og hefur í för með sér skerðingu á ferðafrelsi.“ Þá endar orðsending lögregluþjóna á Vestfjörðum á heilræði:
„Skynsamlegast er að fara að lögum gott fólk.“