Karlmaður hefur verið dæmdur í tíu mánaða óskilorðsbundið fangelsi, meðal annars fyrir brot í nánu sambandi, brot gegn nálgunarbanni og brot gegn sóttvarnarlögum.
Í dómi Héraðsdóms Reykjavíkur kemur fram að maðurinn er ákærður fyrir að veitast að fyrrverandi maka og valda meðal annars kjálkabroti og sárum í andliti. Þá var maðurinn ákærður fyrir ítrekuð brot gegn nálgunarbanni sem konan hafði fengið gegn honum.
Stakk þrisvar af úr Sóttvarnarhúsi
Hann er ennfremur ákærður fyrir brot gegn sóttvarnarlögum, en hann yfirgaf sóttvarnarhús við Rauðarárstíg þann 16. mars síðastliðinn. Hafði honum verið gert að sæta tíu daga sóttkví en fannst á bar nálægt þar frá. Hann yfirgaf sóttvarnarhúsið aftur tveimur dögum síðar, þann sama dag og hann veittist að konunni. Ekki var þar með snubbóttri sóttvarnarsögu hans lokið því hann yfirgaf sóttvarnarhúsið í þriðja sinn þann 21. mars. Hann var handtekinn 25. mars sætt gæsluvarðhaldi frá 5. apríl síðastliðnum.
Með dómnum brýtur maðurinn skilorð dóms frá september í fyrra þegar hann var dæmdur fyrir fíkniefnalagabrot, umferðarlagabrot og auðgunarbrot.
Óregla og neysla
Maðurinn greindi frá því fyrir dómi að óregla og neysla hefði einkennt líf hans um nokkurt skeið og hann væri nú reiðubúinn að horfast í augu við afleiðingar gjörða sinna.
„Kvaðst hann hafa notað tímann sem hann hefði setið í gæsluvarðhaldi til þess að nýta þau úrræði sem honum stæðu til boða í vistinni, svo sem geðheilsuteymi og nýlega hefði hann skráð sig í nám,“ segir í dómi héraðsdóms en litið var til þessara þátta við ákvörðun refsingar.