Þrjár stúlkur í neyð á Þingvallavatni

Mikill viðbúnaður var þegar Neyðarlínu barst tilkynning um þrjár stúlkur sem voru í vanda staddar á bát á Þingvallavatni upp úr klukkan sjö í morgun.

Í tilkynningu frá Slysavarnafélaginu Landsbjörg kemur fram að um hafi verið að ræða uppblásinn bát sem hafi verið farinn að fyllast af vatni og gátu stúlkurnar ekki siglt honum í land.

Voru allar björgunarsveitir Árnessýslu kallaðar út ásamt sveitum af höfuðborgarsvæðinu, sjúkra­flutn­inga­mönn­um frá Suður­landi og Reykja­vík, þyrlu Land­helg­is­gæsl­unn­ar og lög­reglu.

Stelpurnar komust í land af sjálfsdáðum rétt fyrir klukkan átta í morgun. Þá voru þær orðnar mjög kaldar og blautar og fengu aðhlynningu frá sjúkraflutningamönnum, segir í tilkynningunni.