2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

Mexíkóskar pönnsur – Sniðugur réttur sem krakkar elska

Hagsýnir heimilisrekendur eiga alltaf eitthvað tiltækt í frystinum sem auðvelt er að grípa til þegar lítill tími er til þess að stússa í eldamennsku. Hér er sívinsæll barnvænn réttur sem slær alltaf í gegn og er frábær til þess að eiga tilbúna í kistunni. Langsniðugast er auðvitað að útbúa nokkra skammta í einu og frysta í hæfilegum pakkningum fyrir ykkar fjölskyldustærð.

 

Mexíkóskar pönnsur (sniðugar í frystinn)
6-8 stk.

500 g kjúklingabringur
2 tsk. olía
1 tsk. mexíkóskt chili-duft
1 tsk. paprikuduft
1 tsk. kóríanderduft
1 tsk. laukduft
1 tsk. salt
2 msk. olía til steikingar
1 lítill rauðlaukur, sneiddur þunnt
1 paprika, skorin í strimla
2 hvítlauksgeirar, saxaðir fínt
1 krukka mild salsa-sósa (230 g)
150 g rjómaostur
börkur og safi úr ½ límónu
gróft sjávarsalt
nýmalaður svartur pipar
6-8 tortilla-pönnukökur
u.þ.b. 50 g rifinn ostur, t.d. gratínostur
1 lárpera, skorin í bita
1-2 msk. límónusafi
1 lítill vorlaukur, fínt saxaður
hnefafylli ferskt kóríander
gróft sjávarsalt
nýmalaður blandaður pipar

Skerið kjúklingabringur í þunna strimla og blandið saman við olíu og krydd. Látið standa í a.m.k. 30 mín. Hitið olíu á pönnu og steikið lauk þar til hann fer að mýkjast. Bætið þá kjúklingnum saman við og steikið þar til hann hefur brúnast fallega. Setjið papriku og hvítlauk saman við og steikið í 2-3 mín.

AUGLÝSING


Bætið salsa-sósu og rjómaosti út í og hitið þar til rjómaosturinn er bráðnaður. Bragðbætið með límónusafa, berki og salti og pipar. Skiptið blöndunni á milli tortilla-pönnukakanna, rúllið þeim upp og raðið í eldfast mót. Stráið rifnum osti yfir. Á þessu stigi er tilvalið að frysta réttinn.

Hitið ofn í 190°C og bakið þar til osturinn hefur brúnast fallega. Athugið að ef rétturinn er frosinn í gegn þegar hann er settur inn lengist eldunartíminn um allt að 40-60 mín. og þá þarf að hafa álpappír lauslega yfir réttinum svo hann nái að hitna jafnt í gegn. Takið síðan álpappírinn af síðustu 20-25 mín.

Blandið saman lárperu, límónusafa, vorlauk, kóríander og salti og pipar og dreifið yfir réttinn þegar hann er borinn fram.

Texti / Kristín Dröfn Einarsdóttir
Myndir / Hákon Davíð Björnsson
Stílisti / Ólöf Jakobína Ernudóttir

Lestu meira

Annað áhugavert efni