Lagt á borð

Efnisorð

Deila

- Auglýsing -

Ertu að velta fyrir þér hvernig þú ætlar að leggja á borð yfir hátíðina? Systurnar Þórdís og Hrafnhildur Þorleifsdætur dekka hér upp fallegt hátíðarborð til að gefa lesendum skemmtilegar hugmyndir um hvernig hægt sé að nýta blóm og plöntur til að skreyta hátíðarborðið.

 

Lágstemmd og notaleg litapalletta í forgrunni

Hvernig myndir þú lýsa stílnum á heimili þínu? ,,Ætli hann sé ekki nokkuð skandinavískur og klassískur. Ég er mikið náttúrubarn og litapalletta heimilisins er svona frekar lágstemmd og notaleg. Ég hef mikla þörf fyrir að hafa jarðtengingu heimafyrir.  Mér finnst gaman að blanda grófu og fínu saman.  Hjá mér snýst þetta mikið um áferð, fallega efnisnotkun, litaval og gæði,“ segir Þórdís.

 Mynd / Heiðdís Guðbjörg Gunnarsdóttir

Blandað greni og þykkblöðungar í aðalhlutverki

Kransinn við útidyrahurðina fangað athygli okkar enda veglegur og fallegur.  ,,Við notuðum blandað greni og grenitegundir eins og normansþin, blágreni, cryptomeriu, mimósu og grófar eucalyptus-greinar.  Svo skreyttum við hann aðeins með þykkblöðungum og útkoman er frábær,“ útskýrir Þórdís.  Aðventukransinn er líka afar eftirtektarverður og litirnir rómantískir: „Hrafnhildur systir bjó til aðventukransinn og notaði ýmsar tegundir af greni. Ólík efni geta myndað svo fallega heild séu þau rétt sett saman.“

Koparkannan á miðju borðinu er frá Heimahúsinu. Koparjólatré-kertastjakarnir og lituðu glereplin eru frá Blómagalleríi og stærri stjakarnir frá Heimilum og hugmyndum og AFF conseptstore. Plattarnir undir stellinu eru úr The Pier.
Mynd / Heiðdís Guðbjörg Gunnarsdóttir

Matarstellið í miklu uppáhaldi

Hátíðarborðið er glæsilegt og plönturnar vekja athygli, hvaða plöntur eru þetta? ,,Á hátíðarborðið settum við afskorna jólarós í fallega koparkönnu frá Heimahúsinu á miðju borðsins. Út frá miðjunni lékum við okkur svo með blöndu af stórum og litlum þykkblöðungum og  tveimur stórum tillandsiu-plöntum.

Servíetturnar á borðinu eru líka fallega skreyttar. ,,Þetta er fjaðraskraut sem við rákumst á í Ilva  og fannst skemmtilegt að nota til skrauts. Matarstellið á borðinu er yfir fimmtíu ára gamalt en foreldrar okkar fengu það í brúðargjöf frá föðurömmu og -afa. Við systur höfum dáðst að því í gegnum árin og eigum dýrmætar minningar tengdar stellinu.“

Mynd / Heiðdís Guðbjörg Gunnarsdóttir

Fegurðina má finna úti í náttúrunni

Hvernig myndir þú lýsa uppáhaldsjólastíl ykkar systra? „Við erum í grunninn mikil náttúrubörn, fæddar og uppaldar á Ísafirði þar sem náttúran skartar sínu fegursta allt um kring.  Einfaldleiki og elegans er svona það sem einkennir okkur einna helst.  Við sækjum mikið í að nota efni sem finna má í náttúrunni og leggjum mikla áherslu á gott handverk og gæði í því sem við erum að gera. En svo dettum við líka alveg í blingstuð á aðventunni og þá má nota allt, glimmer, gull, silfur og allan pakkann, sem er rosalega gaman líka.“

Texti /  Sjöfn Þórðardóttir

 

- Auglýsing -

Athugasemdir

Lestu meira