Tónlistarkonan Elín Eyþórsdóttir, sem verður fulltrúi Íslands í Eurovision í maí, og leikkonan Íris Tanja Flygenring eru nýtt par. Vísir greinir frá þessu en þar segir að parið hafi byrjað saman nýlega.
Eins og flestum er sennilega kunnugt um sigraði Elín Söngvakeppni sjónvarpsins síðasta laugardag, ásamt systkinum sínum. Þar fluttu systurnar Sigga, Beta og Elín lagið Með hækkandi sól eftir tónlistarkonuna LayLow. Eyþór, bróðir systranna, lék með þeim á trommur á sviðinu.
Íris Tanja er leikkona sem hefur getið sér gott orð undanfarið. Hún lék til að mynda í sjónvarpsþáttunum Kötlu á Netflix og Ófærð. Þessa dagana leikur hún í sýningunni Blóðuga kanínan, eftir Elísabetu Jökulsdóttur, sem sýnd er í Tjarnarbíói.