Davíð Oddsson, ritstjóri Morgunblaðsins, klúðraði Reykjavíkurbréfinu í sunnudagsútgáfu blaðsins um helgina. Morgunblaðið greinir frá því í blaðinu í dag að Davíð hafi ekki tekist að vista skrif sín og því hafi enginn pistill birst í blaðinu.
Orðrétt segir í blaðinu í dag: „Af tæknilegum ástæðum birtist ekkert Reykjavíkurbréf í sunnudagsblaði Morgunblaðsins. Skrifin vistuðust ekki og glötuðust og þar sem þetta kom seint í ljós var ekki unnt að gera annað en sleppa bréfinu. Áskrifendur eru beðnir velvirðingar á þessu.“
Sóley Tómasdóttir, fyrrverandi borgarfulltrúi VG, er ekki á meðal aðdáenda Davíðs. Hún gerir grín af þessu á Twitter og lætur ímyndunaraflið ráða. „Ég sé aðstæðurnar ljóslifandi fyrir mér: Allskonar fólk í panikki í Hádegismóum að reyna að finna út úr málunum með Davíð gargandi á kantinum, öskureiðan út í tölvuna fyrir að gleypa skrifin.“