Agnes M. Sigurðardóttir, biskup Íslands, er afar umdeild i embætti sínu. Hvert málið rekur annað þar sem biskupinn þykir ganga óeðlilega fram í embætti og sýna óráðsíu. Innan Þjóðkirkjunnar logar nú eldar óyndis vegna fjárausturs biskupsins. Ásdís Clausen fjármálastjóri kirkjunnar hætti eftir stuttan stans í embætti. Af óútskýrðum ástæðum gerði Agnes viðbótarsamning við hana og rétti henni 20 milljónir króna við starfslok auk þess að leyfa að hún tækist á hendur annað starf án þess að greiðslur féllu niður. Framkvæmdastjóri kirkjuþings tók fram fyrir hendur biskups og voru greiðslur til Ásdísar stöðvaðar. Fréttablaðið greinir frá þessu og upplýsir að málið hafi verið sent til skoðunar hjá utanaðkomandi lögmanni.
Agnes er gríðarlega umdeild í embætti og þá ekki síst fyrir óstjórn í fjármálum og meinta valdníðslu. Nýlega kom upp mál þar sem hún neitaði syrgjendum um þá bón að séra Gunnar Björnsson fengi að jarðsyngja eiginkonu og móður. Þótti framganga biskups í því máli einkennast af illsku í garð prestsins sem var gerður útlægur úr Hveragerðiskirkju. Agnes beitti sér einnig harkalega gegn séra Skírni Svavarssyni og hrakti hann úr embætti. Innan kirkjunnar er vilji til þess að skipta út biskupnum og koma skikk á málin innan þessa stærsta trúfélags Íslands …