Gísli Einarsson, sjónvarpsmaður, var heppinn að sleppa ómeiddur úr sjóslysi sem hann lenti í á landi, líkt og hann lýsir því sjálfur í hlaðvarpsþættinum 10 bestu með Ásgeiri Ólafs.
Gísli var staddur á Akureyri, eftir að hafa brunað þangað korter í fermingu frumburðar síns, fjölskyldunni til lítillar gleði eins og hann segir sjálfur, til að taka viðtal fyrir þáttinn Út og suður, sem hann var þá með á RÚV.
Gísli var að keyra eftir Drottningarbrautinni þegar kerra með báti losnaði aftan úr bíl sem ók fyrir framan hann. Gísli vissi ekki hvað hann ætti til bragðs að taka en beygði út af götunni og inn á grasbala við hlið hennar.
Ekki vildi betur til en svo að kerran með bátnum elti bíl Gísla og endaði með því að báturinn lenti á kaf inni í bíl hans, rétt fyrir aftan bílstjórasætið. Bíllinn varð gjörónýtur og þyrfti varla að spyrja að leikslokum hefði báturinn endað örlítið framar.
Gísli segir þetta vera gott dæmi um hve seinheppinn hann er oft á tíðum: „Það er einn af hverri milljón líkurnar og ég er yfirleitt hann, þessi eini.“
Kona Gísla hélt hann væri að ljúga að sér og trúði ekki frásögn hans, fyrr en hún sá viðtal við hann í sjónvarpsfréttum vegna slyssins.
Þetta er eina sjóslysið sem Gísli hefur lent í og segist hann jafn framt vera eini maðurinn sem hann viti um sem lent hafi í sjóslysi á landi.
Í viðtalinu fer Gísli einnig á persónulegri nótur og segir frá fjölskyldu sinni.
Konunni sinni, Guðrúnu Huldu Pálmadóttur, kynntist hann í Kaupfélaginu á Hofsósi. En Gísli kemst í vandræði aðspurður hver giftingardagur þeirra hjóna sé:
„Tuttugasta og þri uuu..öbb böbb.“
„Hér er ekkert klippt Gísli minn,“ segir Ásgeir.
„Uuuu, það er eitthvað lélegt samband hérna, það var í lok ágúst,“ segir Gísli að lokum hlæjandi.
Hægt er að hlusta á viðtalið í heild sinni hér.