Haraldur Benediktsson hefur verið ráðinn bæjarstjóri Akraneskaupsstaðar, samkvæmt tilkynningu frá Akraneskaupsstað.
Skagafréttir sögðu frá því í gær að Haraldur hafi verið ráðinn bæjarstjóri Akraneskaupsstaðar en hann hefur síðastliðinn áratug verið alþingismaður Sjálfstæðisflokksins fyrir Norð-Vesturkjördæmi. Þar sat hann meðal annars í atvinnuveganefnd, fjárlaganefnd og stjórnskipunar- og eftirlitsnefnd Alþingis. Þá var hann stjórnarformaður Orkusjóðs og veitti stjórn Fjarskiptasjóðs formennsku síðustu ár. Að auki hefur Haraldur verið formaður fjölda nefnda og stýrihópa á vegum stjórnvalda og Bændasamtaka Íslands.
„Haraldur hefur þekkingu og reynslu sem við bæjarfulltrúar erum fullviss um að muni nýtast vel í starfi bæjarstjóra, Akraneskaupstað og samfélaginu hér á Akranesi til heilla. Alger einhugur ríkir í bæjarstjórn um ráðningu Haralds og við erum þess fullviss að hann muni veita bæjarfélaginu öfluga forystu á áframhaldandi uppgangstímum bæjarins,“ segir Valgarður Lyngdal Jónsson, forseti bæjarstjórnar Akraness.
Hinn nýji bæjarstjóri segir Akranes vera eitt mest spennandi sveitarfélag landsins og að það sé sannur heiður að fá að gegna hlutverki bæjarstjóra. „Ég hlakka til að takast á við verkefnin með öflugum hópi bæjarstjórnar og starfsmanna Akraneskaupstaðar.“