Stórstjarnan Björk Guðmundsdóttir bjó afar lengi til skiptis í New York í Bandaríkjunum og á Íslandi; nú hefur hún sagt skilið við búsetu í Bandaríkjunum – býr eingöngu hér á Íslandi, en það er vefmiðillinn DV sem greinir frá þessu.
Björk fór í viðtal við Pitchfork þar sem hún útskýrir hvers vegna hún tók þá ákvörðun að búa á Íslandi:
„Ofbeldið í Bandaríkjunum er á skala sem ég get ekki einu sinni náð utan um. Það að eiga dóttur sem er hálf bandarísk og gengur í skóla sem er 40 mínútum í burtu frá Sandy Hook…“ segir Björk og er þarna að vísa til skotárásinnar sem átti sér stað í Sandy Hook grunnskólanum, 14. desember árið 2012. Þá myrti hinn tvítugi Adam Lanza 26 manns í skólanum; 20 börn á aldrinum 6-7 ára, og sex starfsmenn skólans. Tók síðan eigið líf; en fyrr um daginn hafði Lanza myrt móður sína á heimili þeirra.
Björk lýsir því hvernig íslenskt samfélag bregst allt öðruvísi við harmleikjum heldur en íbúar í Bandaríkjunum:
„Ef ein manneskja er drepin þá finnum við öll fyrir því.“