Það logar allt á spjallsvæði íslenskra veganista á Facebook eftir að vakin var þar inni athygli á beygingarlýsingu Árnastofnunar á hugtakinu veganismi. Þar var gefið í skyn að vegan-lífstíllinn væri ættaður frá djöflinum sjálfum og hann tengdur við hugmyndafræði satanisma.
Eins og áður sagði voru á vef Árnastofnunar – sýndar beygingarmyndir hugtaksins veganisma og þegar röðin var komin að þolfalli, þágufalli og eignarfalli breyttist beygingin úr veganisma yfir í satanisma.
Og flestir íslenskir veganistar virðast ósáttir við skilaboðin sem Háskóli Íslands sendir þeim. Kristín er ein hinna ósáttu. „Þetta nær ekki nokkurri átt,“ segir hún. Harpa tekur í sama streng. „Þetta er aumkunarvert og merki um minnimáttarkennd,“ segir Harpa.
Og Magdalena nokkur er alls ekki sátt. „Mér finnst það alls ekki fyndið. Ekki vegna þess að ég sé hrædd við djöful, eða satanista, en þetta á bara ekki heima á vefsíðu opinberra stofnana,“ segir hún.
Arnar er einn þeirra sem bendir á að þetta hafi án efa allt verið í gríni gert. „Þó þú sért vegan þarftu ekki að fórna húmornum. Þetta er bara fyndið og verður líklegast lagað þar sem þú ert búin að vekja athygli á þessu,“ segir Arnar.