Steinunn Ólína Þorsteinsdóttir tekur upp hanskann fyrir Sólveigu Önnu í nýrri Facebook-færslu.
Sólveig Anna Jónsdóttir stendur í ströngu um þessar mundir en hún undirbýr nú ásamt öðru Eflingarfólki verkfallsaðgerðir. Svo virðist, miðað við samfélagsumræðuna og fréttir af Eflingsmálum að öll spjót standi á Sólveigu Önnu. En hinn skeleggi verkalýðsforingi á sér stuðningsmenn víða en einn þeirra er stórleikkonan Steinunn Ólína Þorsteinsdóttir.
Í færslu sem hún skrifaði á Facebook segist hún engar áhyggjur hafa af Sólveigu Önnu en annað megi segja um Halldór Benjamín hjá Samtökum atvinnulífsins:
„Ég hef bara engar áhyggjur af Sólveigu Önnu og fólki hennar í Eflingu og styð þau í því að bæta kjör sín með öllum tiltækum ráðum. Ég hef hinsvegar miklar áhyggjur af Halldóri Benjamín og því fólki sem finnst sjálfsagt að fæla verkafólk frá því að nýta verkfallsrétt sinn og gera því að sitja áfram fast í fátæktarprísund möglunarlaust. Það er eitthvað mikið að slíkum hugsunarhætti. Og málflutningurinn mjúkmæltur dapurlegur.“