„Er einhver hér sem getur tekið að sér að hjúkra alvarlega veikum ketti til heilsu og býr í ilmefnalausu heimili með engum þekktum rakaskemmdum, helst nýlegu heimili?“ svo hljóðar ákall sem birtist inni á hópi á Facebook sem nefnist Kattarsamfélagið. Óskað er eftir fósturheimili fyrir Fjólu sem er heimilisköttur fimm manna fjölskyldu. Fjóla sem og öll fjölskyldan eru á hrakhólum vegna myglu í húsnæði þeirra og glíma þau hvert og eitt við veikindi sökum myglunar. Eigandi Fjólu tekur fram að hún sé alvarlega veik og sinna þurfi henni mjög mikið.
Fjölskyldan hefur þurft að sækja á náðir aðstandanda. En sökum kattarofnæmis þar hefur Fjóla ekki kost á að dvelja með fjölskyldunni sinni.
Eigandinn lýsir aðstæðum Fjólu svo: „Hún er búin að vera inn og út af spítala í meira en viku en hún þarf svo oft að fara „heim“ þar sem það er ekki næturvakt á dýraspítölum,“ og bætir við að hún viti af neyðarvaktinni en hún sé ekki fýsilegur kostur þar sem dýrið dvelji sjaldanst á sama stað tvisvar. Kettir eru í eðli sínu heimakærir og eiga erfitt með tíðar breytingar, þá sérstaklega þegar þeir kljást við alvarleg veikindi í ofan á lag.
Fjóla sem verður tveggja ára í næsta mánuði er búin að fara einu sinni í blóðgjöf og líkur telja að komist hún ekki í öruggt húsaskjól sem henti hennar aðstæðum muni hún ekki ná að jafna sig á veikindunum.
Hægt er að hafa samband við eiganda Fjólu í gegnum síðuna Kattarsamfélagið.