Fjölmiðlakonan og rithöfundurinn Snæfríður Ingadóttir var miður sín í morgun eftir að hafa orðið vitni af sorglegum atburði á Tenerife. Þegar hún var á morgunskokki sínu á suðurhluta eyjarinnar hljóp hún fram á líkflutninga flóttafólks.
Snæfríður birti myndband inni í hópi Íslendinga sem búsettir eru á Tenerife af svæðinu sem búið er að loka af vegna flutninganna. Af lýsingu hennar að dæma virðast þónokkrir hafa farist um borð í báti sem kom frá Afríku. „Angist heimsins er nær en maður grunar. Ég fór út að hlaupa í morgun og lögreglan stoppaði mig í götunni minni. Þar er búið að loka af allt svæðið því þar er bátur með flóttamönnum og ég sé að þeir eru búnir að vera að bera líkpokana inn í bíla. Ó, hvað þetta er sorglegt. Þessi fallegi dagur og svona byrjar hann hjá þessu fólki em ekki hefur komist yfir hafið í leit að betra lífi,“ segir Snæfríður.
Á nýliðnu ári varð gífurlega aukning á komu flóttafólks frá Afríku til eyjanna í Kanaríeyjaklasanum. Aðeins eru rúmir 100 kílómetrar þar sem styðst er á milli og á síðasta ári voru skráðir ríflega 11 þúsund afrískir flóttamenn til eyjanna í samanburði við ríflega 2.500 árið þar á undan. Metfjöldi á einni helgi í fyrra voru rúmlega 1.600 flóttamenn sem komu yfir hafið, oft á tíðum á ansi lélegum skipakostum.