Bogi Ágústsson er lang vinsælasti sjónvarpsmaður Íslands samkvæmt könnun sem Capacent Gallup gerði fyrir fjölmiðlanefnd. Sú könnun var ekki kynnt sérstaklega en er þó birt í skýrslu nefndarinnar um RÚV. Sú skýrsla fjallar um störf RÚV árið 2019 en var birt á netinu rétt fyrir áramót.
Björgvin Guðmundsson, upplýsingafulltrúi hjá KOM, vekur athygli á þessari könnun á Twitter en líkt og fyrr segir þá fór lítið fyrir henni. Könnunin fór þannig fram að þátttakendur voru beðnir um að skrifa nafn þeirra sem viðkomandi kynnu best við á skjánum. Listann má sjá í heild sinni hér fyrir neðan.
Í raun kemur fátt á óvart þar. Á eftir Boga kemur gífurlega vinsælt sjónvarpsfólk líkt og Jóhanna Vigdís Hjaltadóttir, Logi Bergmann og Edda Andrésdóttir. Það vekur hins vegar meiri athygli hverjir komast ekki á blað hjá þjóðinni.
Eini íþróttafréttamaðurinn sem kemst á blað er Guðmundur Benediktsson. Enginn þeirra sem flytja íþróttafréttir eftir sjónvarpsfréttir RÚV eru nefndir. Það sama á við um menninguna, fáir eða enginn nefnir Guðrúnu Sóley Gestsdóttur eða Bergstein Sigurðsson þrátt fyrir að þau séu tíðir gestir í stofur Íslendinga.
Svo vekur athygli að nokkrar sjónvarpskonur á RÚV komst ekki á lista þrátt fyrir sjást nokkuð oft. Fréttastjórinn Rakel Þorbergsdóttir kemst ekki á lista. Það sama má segja um Láru Ómarsdóttur í Kveik. Fanney Birna Jónsdóttir er aðra hverja helgi með Silfrið til skiptis við Egil Helgason. Tæplega fimm prósent nefna hann en Fanney kemst ekki á lista. Önnur sjónvarpskona sem var oft á skjánum, Björg Magnúsdóttir, kemst ekki heldur á lista.