Árni kannast ekki við vínstuld á Bessastöðum: „Gefinn kostur á að bæta ráð sitt“

Skrifstofustjóri skrifstofu forseta Íslands segir embættið ekki kannast við vínstuld á Bessastöðum. Segir mann sem uppvís varð af kynferðislegu áreiti í vinnu- og námsferð starfsmanna hafa fengið áminningu.

Skrifstofustjóri skrifstofu forseta Íslands, Árni Sigurjónsson, segir í svari við spurningum Mannlífs, að ekki sé embættinu kunnugt um að áfengi hafi horfið úr vínkjallara embættisins en lögfræðingurinn Sigurður G. Guðjónsson hélt því fram nýverið.

Einnig segir í svarinu að forsetaritari embættisins hafi tekið á kynferðislegu áreiti innan starfsmannahóps forsetans og veitt gerandanum áminningu í samræmi við 21. grein starfsmannalaga ((nr. 70/1996, https://www.althingi.is/lagas/151b/1996070.html). Þá var honum „gefinn kostur á að bæta ráð sitt, eins og skylt er skv. 44. grein laganna sem hann og gerði.“ Árni bætir við, „Í ljósi þess að maðurinn tók sig á, leitaði sér sérfræðiaðstoðar og bað hlutaðeigandi starfsmenn afsökunar, var honum gefinn kostur á að koma aftur til starfa.“ Sá sem um ræðir starfar ekki lengur hjá embættinu.

Skrifstofustjórinn sagði ennfremur að embætti forseta Íslands hafi ekki greitt neinar fébætur í sambandi við umrætt atvik. Var forseti upplýstur um málið en þann 4. október 2019 birti hann yfirlýsingu um málið á heimasíðu forsetaembættisins; (https://www.forseti.is/media/5364/2019_10_04_yfirlysing.pdf ).