Arnþrúður líkir þessu við „Dirty weekend“ – Inspired by Iceland sagt hvetja túrista til afbrota

Arnþrúður nokkur Heimisdóttir segist ekki skemmt yfir auglýsingu á vegum markaðsherferðarinnar Inspired by Iceland. Hún deilir áhyggjum sínum innan Facebook-hópnum Bakland Ferðaþjónustunnar. Arnþrúður geldur varhug við færslu þar sem sagt er frá því að á Íslandi megi finna kofa og hús á hálendinu sem nú séu yfirgefin.

„Er þetta ábyrgðarfull auglýsing hjá Inspired by Iceland? 1.7 k like. Ég er hrædd um að þetta sé hvatning til ferðamanna til að ferðast um landið og gerast húsbrotsfólk og gista án þess að biðja um leyfi í fjallaskálum (og sumarhúsum). Eru ekki allir fjallaskálar í eigu einhvers? Eru einhverjir fjallaskálar í svona góðu standi sem eru „Abandoned“, væru þeir ekki orðnir ónýtir í stórviðrum innan fárra ára? Er þetta í lagi?,“ spyr Arnþrúður.

Hún líkir þessu við fyrir misheppnaðar auglýsingar. „Eitt sinn var auglýst „Dirty weekend in Iceland“ þar sem breskir ferðamenn voru í raun hvattir að fara til Íslands til að gerast ágengir við íslenskar stúlkur á djamminu. Ein markaðssetningin hvatti erlenda ferðamenn til að vaða í hrossastóð án þess að spyrja um leyfi (með ófyrirsjáanlegum afleiðingum). Nýlegt plott gekk út á að skemma upplifun ferðamanna á íslenskum náttúruperlum með hátalaraöskri. Fleira mætti nefna til um markaðssetningu sem hvetur til slæmrar hegðunar gagnvart Íslendingum. Hvaða hugsunarleysi er þetta eiginlega hjá íslenskum markaðsyfirvöldum?“

Viðbrögð hópsins eru nokkuð fjölbreytt og sitt sýnist hverjum. „Sé bara ekkert við þessa auglýsingu sem hvetur fólk til að gista í þessum skálum,“ skrifar ein kona meðan maður nokkur skrifar: „Sammála Arnþrúður Heimisdóttir það er bara að ýta undir það að fólk gistir hvar sem er. Segir svo að það var yfirgefið. Ekki sniðug auglýsing. Og er það virkilega yfirgefin hús á hálendinu?“