Nístandi myndband sýnir hvaða áhrif COVID-19 kórónaveiran hefur haft haft á Ítalíu. Í myndbandinu hér fyrir neðan má heyra karlmann tala á ítölsku um leið og hann sýnir forsíðu dagblaðsins L’Eco di Bergamo, sem gefið er út í borginni Bergamo, um 50 km frá Milanó, í Lombardy héraðinu þar sem kórónuveirufaraldurinn hefur haft gríðarleg áhrif.
Um er að ræða eintak blaðsins frá 9. febrúar og flettir maðurinn upp á dánartilkynningum þess og sýnir eina og hálfa blaðsíðu af dánartilkynningum Þennan dag voru skráð dánartilfelli vegna kórónaveirunnar þrjú talsins.
Maðurinn heldur síðan á sama dagblaði frá föstudeginum 13. mars, en þá höfðu skráð smit rokið með ógnarhraða í 17.600 talsins, þar af 1266 andlát.
Hann flettir hægt í gegnum blaðsíðurnar og telur, 10 blaðsíður af dánartilkynningum.
Giovanni Locatelli birtir myndbandið á Facebook-síðu sinni, en hann er frá Cerete, sem er bær um 40 km frá Bergamo.
Ítalía er það land, fyrir utan Kína, sem hefur farið verst út úr kórónaveirufaraldrinum, í dag eru greind smit yfir 21 þúsund og andlát 1441 talsins. Heilbrigðiskerfi landsins er í molum eftir mikinn fjölda smita vegna COVID-19, þrátt fyrir samkomubann til að reyna að sporna við útbreiðslu veirunnar.