Eyþór Arnalds, oddviti Sjálfstæðisflokksins í borgarstjórn Reykjavíkur, fordæmir ummæli félaga síns, Ólafs Guðmundssonar varaborgarfulltrúa. Hvort að sá síðarnefndi þurfi að leita sér aðstoðar vegna viðhorfa sinna segir oddvitinn það ekki vera sitt að meta.
Eyþór segist líta ummæli varaborgarfulltrúa flokksins alvarlegum augum. Hann fordæmir þau harðlega en vill þó ekki ganga svo langt að krefjast afsagnar hans.
Ummæli Ólafs hafa verið fordæmd víða en í þeim segir hann skotárás á bíl Dags B. Eggertssonar borgarstjóra honum sjálfum að kenna. Ummælin féllu í athugasemdakerfi Vísis en Ólafur hefur beðist afsökunar á þeim.
Sjá einnig: Ólafur miður sín og bíður eftir símanúmeri Dags: „Bara gert í bríeríi rétt fyrir svefninn“
Orðrétt sagði Ólafur: „Byrjaðu á sjálfum þér…. Hér er afleiðing af því sem hampað hefur verið frá svokallaða hruninu 2008. Nú er byltingin komin heim og þú verður bara að taka því Hr. borgarstjóri.“
Eyþór segist skilja vel þau viðbrögð netverja að krefjast afsagnar Ólafs varaborgarfulltrúa. Aðspurður hvort hann muni grípa til einhverra aðgerða varðandi stöðu Ólafs segir hann það verða skoðað. „Við munum fara yfir þetta, þetta er ólíðandi og það er mér efst í huga að fólk ýti ekki undir ofbeldisumræðuna með neinum hætti. Ólafur þarf náttúrlega að biðjast afsökunar á þessu og svara fyrir þetta því orðum fylgir ábyrgð. Ég fordæmi svona ummæli alfarið og tel þau bæði ósmekkleg og óboðleg,“ segir Eyþór.