Þórarinn Ævarsson, eigandi Spaðans og fyrrverandi framkvæmdastjóri IKEA, hafnar því að hann hafi selt bakkelsi í IKEA undir kostnaðarverði. Hann segir reksturinn alltaf hafa skilað hagnaði, bæði veitingastaður IKEA og bakaríið á jarðhæð verslunarinnar. Þessu greinir Þórarinn í samtali við ViðskiptaMoggann í dag þegar hann er spurður út í þessar ásakanir.
Þórarinn rekur í dag pizzastaðinn Spaðann. Pizzurnar þar eru nokkuð ódýrari en gengur og gerist, sem dæmi kostar lítil margarita pizza á Spaðanum 700 krónur á meðan minnsta margarita pizzan kostar 1.310 krónur á Dominos.
Þórarinn segir lykilinn að lágu verði vera að taka burt allan auka kostnað. T.d. er ekkert símakerfi hjá Spaðanum og þurfa viðskiptavinir að panta pizzur á Netinu eða á staðnum. Sömuleiðis er ekki boðið upp á heimsendingu hjá Spaðanum.
Þá þarf viðskiptavinurinn að greiða allt fyrir fram. Þórarinn segir það auðvelda vinnu við uppgjör og draga úr affalli.
Þórarinn segir vélar einnig auðvelda starfsfólki vinnuna og flýta fyrir, svo sem sósuvél sem sprautar sósu á deigið og önnur sem fletur deigið út.